LIGTE MUSIEKORKES

Die ligte musiekorkes het in 2017 die lig gesien. Maestro Danie het groot gedroom en met 16 leerders, wat gegroei het to 27 leerders, het die pret begin. Met verskillende musiekinstrumente waaronder strykinstrumente, koperblaasinstrumente, houtblaasinstrumente, perkussie en klavier was Hoёrskool Oos-Moot se terrein nooit weer stil nie.

Die meeste van die orkeslede kon geen musiekinstrument slaan, blaas of bespeel nie, maar het met letterlik honderde ure se oefening en nog meer ure se pret, hul instrumente leer speel.  Die orkes het dieselfde jaar die SA – kompetisie (SASBA) se Ope afdeling gewen. Daarvoor het die orkeslede ook pennings by die skool ontvang en hul Nasionale Kleure.

In 2018 het die orkes gegroei tot 38 lede en braaf geraak met die speel van Michael Jackson se musiek. Die orkeskultuur het ontwikkel en vele tradisies is gebore.  Mnr. Alexander de Kock (‘n BMus-student) het as hulpafrigter by die orkes aangesluit.  Talle optredes, verjaarsdagkoekies elke maand, heerlike kos op oefennaweke (deur die Kokkenote (groep orkes ouers), oefenkamp in die Julie skoolvakansie, fondsinsamelingsprojekte en vele meer het gevolg. 

‘n Groot hoogtepunt was die orkes se formele konsertklere wat balrokke vir die dogters in koningsblou, vlootblou en turkoois insluit. Die staanders was getooi in bypassende staanderlappies, die ligte het geflits en die drama was daar en so wen ons weereens die SA Ope-afdeling en sommer ook die trofee vir Beste Algehele Indruk, Netheid en Konsertdissipline. Hierdie voorreg was nog groter weens die feit dat die SA-kompetisie deur ons eie skool aangebied was en danksy samewerking van orkeslede, ouers, BL, OMR en nog baie meer ‘n reuse sukses was. Die laaste suiwer noot vir 2018 is gespeel toe die orkes die Kommunikatorstrofee by die Hoёrskool Oos-Moot se Kultuurdinee ontvang. Hierdie trofee is vir die kultuurleerling of -groep wat die skool se naam met onderskeiding uitgedra het. Sowaar ‘n trofee om op trots te wees.

In 2019 het die orkes homself geadverteer en gegroei tot 47 orkeslede. Dit sluit ook ‘n paar laerskoollleerlinge in wat nie meer kon wag om in die orkes te wees nie. Die orkes het vroeё Kersgeskenk by die skool ontvang en is nou die trotse eienaars van ‘n nuwe Clavinova,  timpani’s dromme, klankstelsel en nog vele ander instrumente.

Die musiek is absoluut fantasies met liedere uit bekende films onder andere Queen, 2001: A Space Odyssey, Gabriel’s Oboe uit “The Mission”, Last of The Mohicans en nog vele meer. Hierdie jaar is daar ook ‘n ensemble gestig (bestaan uit 20 orkeslede bestaan wat al reeds optree en aan die SASBA kompetisie gaan deel neem. Mnr. Alexander is die afrigter van die ensemble.

Die orkes het al reeds by verskeie feeste, skole en gala-aande opgetree. Die hoogtepunt vir die jaar is om die draai met die SA-kompetisie by Reddam House College In Umhlanga, KZN op 27 en 28 September 2019. Soos gewoonlik maak Maestro Danie van hierdie toer ‘n toer om nooit te vergeet nie. Die orkes gaan die hele week toer en verskeie kere optree by ouetehuise en stranduitstappies geniet (bootreis, by plaaslike restaurante smul, KZN Haaie Raad  besoek en vele meer.

Om ‘n lid van die Oos-Moot Ligte Musiekorkes te wees is ‘n voorreg vir enige leerder.  Dit verryk hulle lewens met dissipline, spanwerk en ‘n samehorigheidsgevoel wat net deur honderde ure se saamwerk en saamspeel verkry kan word. Trotse orkeslede is trotse Oosies.

Mnr Danie Smith
smithd@oos-moot.co.za
Afrigter en dirigent

 

Alexander de Kock (Hulpafrigter)