Wat sê ons leerders van die vak
Waarom Verbruikerstudies as keusevak in graad 10 tot 12 neem?
Verbruikerstudies is nie net bloot ‘n vak waar leerders leer om kos te maak of huishoudelike take te verrig nie.
Die vak bied ‘n wye verskeidenheid vaardighede en kennis wat in verskeie beroepsrigtings toegepas kan word.
Verbruikerstudies het ontwikkel uit Huishoudkunde, met ‘n groter fokus op die verantwoordelikheid van die verbruiker. Waar Huishoudkunde primêr op die individu, gesin en gemeenskap gefokus het, rus Verbruikerstudies leerders toe met kennis oor verantwoordelike verbruikersgedrag in verband met voedsel, kleding, behuising, meublement en huishoudelike apparate.
Die vak help leerders om ingeligte besluite te neem en om hulpbronne doeltreffend te gebruik ten einde menslike welstand te verbeter. In die praktiese komponent kry leerders die kans om produkte te ontwikkel en bemarkingstrategieë toe te pas.
Onderwerpe wat in Verbruikerstudies behandel word
Die verbruiker
Voedsel en voeding
Ontwerpbeginsels en -elemente
Kleding
Tekstielvesels en -materiale
Behuising
Entrepreneurskap
Wat leer jy in Verbruikerstudies?
Verbruikersregte, verantwoordelikhede en beskerming
Evaluering van verskaffers van voedsel, klere, meubels en huishoudelike toestelle
Die beginsels van verantwoordelike verbruikersgedrag en hulpbronbestuur
Die invloed van belasting, rentekoerse en inflasie op persoonlike finansies
Voeding en die impak van voedselkeuses op gesondheid
Die belangrikheid van voedselhigiëne en ingeligte besluite oor produkte
Die toepassing van ontwerpselemente in klerekeuse en meublement
Die behoeftes van persone met liggaamsgebreke rakende kleding en behuising
Klein-skaal produksie en entrepreneurskap
Die praktiese aspekte van Verbruikerstudies
Baie skole bied ‘n praktiese komponent aan wat dikwels op voedselvoorbereiding fokus. Die vak is egter veel meer as net ‘n praktiese vaardigheidsvak – dit rus leerders toe met noodsaaklike lewensvaardighede wat in hul daaglikse lewe toegepas kan word.
Verbruikerstudies speel ook ‘n belangrike rol in entrepreneurskap deur leerders die geleentheid te bied om produkte te ontwikkel en te bemark. Die kennis wat in hierdie vak opgedoen word, is van waarde vir elke gemeenskap en dra by tot die ekonomiese ontwikkeling van ‘n gebied.
Moontlike beroepsrigtings:
Voedselindustrie:
Kwaliteitsbestuurder
Produkontwikkeling en -bemarking
Voedselprodukontwikkelaar
Entrepreneur in die gasvryheidsbedryf
Kleinhandelbestuurder en -aankoper
Kledingbedryf:
Mode-aankoper en -bemarker
Kwaliteits- en produkbestuurder
Behuising en ontwerp:
Interieurontwerper en -versierder
Behuisingsontwikkelaar of -konsultant
Kleinhandelbestuurder vir binneontwerp
Ander beroepsmoontlikhede:
Verbruikersopvoeder
Verbruikersadviseur
Verbruikersnavorser
Vaardigheidsopleier
Verbruikerstudies is ‘n veelsydige vak wat waardevolle kennis en praktiese vaardighede bied – nie net vir ‘n spesifieke beroep nie, maar ook vir die alledaagse lewe. Dit is ‘n uitstekende keuse vir enige leerder wat belangstel in finansiële beplanning, entrepreneurskap, gesonde leefstyle en ‘n suksesvolle toekoms.
Slaagvereistes
Graad 10 tot 12 – Twee ander vakke 40% of drie ander vakke 30%