Die Ink en Inspraak-groep is ‘n dinamiese kultuurinisiatief wat fokus op leesbevordering, kreatiewe skryfwerk en leerderbetrokkenheid. Die groep bestaan uit die volgende komponente, naamlik Inspraak, die boekklub en Ink die skool se literêre publikasie, die Mootgenoot.
Die Ink fokus op die samestelling en publikasie van die skool se tydskrif. Die tydskrif staan bekend as die Mootgenoot. In 2026 trek die Mootgenoot ‘n nuwe baadjie aan en word amptelike as ‘n tydskrif herontwerp, met ‘n moderne uitleg en ‘n verskeidenheid kreatiewe bydraes.
Die eerste publikasie vir 2026 is uitgereik in April en hieronder elektronies beskikbaar.
Die Mootgenoot-redaksiespan het onlangs die voorreg gehad om opleiding te ontvang van Mizanne van Wyk, ervare joernalis van Maroela Media. Tydens die sessie het die span waardevolle insigte gekry in die wêreld van joernalistiek, nuusberiggewing, onderhoudvoering, etiese verslaggewing en professionele skryfwerk.
Die geleentheid om by ‘n joernalis met uitgebreide bedryfservaring te leer, bied vir ons Mootgenoot-span ‘n unieke voordeel. Dit help hulle nie net om hul skryf- en kommunikasievaardighede verder te ontwikkel nie, maar gee hulle ook eerstehandse blootstelling aan die standaarde, verantwoordelikheid en kreatiwiteit wat met professionele joernalistiek gepaardgaan.
Ons is opgewonde oor die jaar wat voorlê en sien uit na die kreatiwiteit, entoesiasme en vars perspektiewe wat ons MootGenoot-redaksiespan na ons skool se nuus en kommunikasie gaan bring.
Die boekklub vergadering kwartaalliks. Hierdie byeenkomste skep ‘n veilige en stimulerende ruimte waar leerders hul menings oor voorgeskrewe en gekose boeke kan deel, krities kan dink en met mekaar in gesprek kan tree oor temas, karakters en skryfstyl.
‘n Verdere fokus is om skrywers te nooi om met leerders in gesprek te tree. Hierdie interaksie vind of persoonlik of aanlyn via Microsoft Teams plaas en bied aan leerders ‘n unieke geleentheid om eerstehands insig te kry in die skryfproses, kreatiewe denke en die wêreld van publikasie.
Ons leerders se kreatiwiteit verras elke jaar. Die Oosie-Ink is ‘n spesiale kreatiewe bundel met ’n versameling van gedigte, opstelle en kunswerke wat deur ons eie Oosies geskep is. Dis iets waaroor ons ongelooflik trots is! Die bundel gee vir ons leerders ’n kans om hul stemme en talent met die hele skoolgemeenskap te deel. Van dromerige gedigte tot snaakse stories en pragtige kunswerk – daar’s iets vir almal om te waardeer.
