Die skoleliga begin in die derde kwartaal, en bestaan uit vier ligawedlope, asook ’n +2km Dash-item. Deelname vind plaas in die volgende vier kategorieë:
Junior seuns en dogters: o/14 en o/15
Senior seuns en dogters: o/16 tot o/19
2026
Liga 1
Die seisoen is afgeskop met die eerste liga by Prestige College.
- Senior Seuns (296 atlete): JM Maritz (14de), Daniel Esterhuizen (47ste)
- Junior Dogters (214 atlete): Mizaan Louwies (11de), Lana du Plessis (43ste)
- Junior Seuns (206 atlete): Ruben Esterhuyse (45ste), Willem van der Merwe (46ste), Adriaan Maxwell (60ste)
Op 5 Augustus tydens die derde skoleliga by Tuks is mooi prestasies gelewer.
- JM Maritz het ‘n uitstekende 6de plek in die o.19-afdeling behaal
- Chanelle Groenewald eindig 9de.
- Leandri Robinson en Alex Deysel het ook sterk vertonings gelewer met onderskeidelik 22ste plekke.
Spanplasings: Junior Meisies: 21ste, Junior Seuns: 11de, Senior Meisies: 12de en Senior Seuns: 17de
Ons landloopatlete toon goeie vordering tydens die tweede en derde skolelandloopligas.
Ons kon vier volledige spanne, met minstens vier atlete per span, inskryf. Die Senior Seunsspan het selfs uit ses atlete bestaan.
Mizaan en Daniel het albei hul posisies sedert die vorige liga met meer as twee plekke verbeter – ’n goeie aanduiding van hul harde werk en volgehoue ontwikkeling.
Die derde skolelandloopliga is op 5 Augustus by Tuks aangebied. Ten spyte van sterk kompetisie het die Oosie-atlete weer goeie deursettingsvermoë getoon en waardevolle wedloopervaring opgedoen.
JM Maritz het een van die hoogtepunte van die dag gelewer met ’n uitstekende 6de plek in die o.19-afdeling.
By die senior meisies het Chanel Groenewald ’n indrukwekkende 9de plek behaal, terwyl Leandré Robinson en Alex Deysel albei die 22ste plek behaal het.
Hoewel die formele skolelandloopliga nog nie afgeskop het nie, het die Oosie-atlete reeds hul staal gewys tydens verskeie klub- en voorseisoenbyeenkomste. Ons atlete het Gauteng-Noord met trots by die Interprovinsiale Veldloopkampioenskappe verteenwoordig. Om vir hierdie span te kwalifiseer en op hierdie vlak deel te neem, is reeds ‘n besondere prestasie. Top 10-prestasies: JM Maritz (4de plek, Mans o.20) en Mizaan Louwies (6de plek, Dogters o.14). Merkwaardige prestasies. Ons atlete het sterk meegeding by die NWU-reeks, die Menlopark-aflos en die byeenkoms by Sutherland, waar verskeie Oosies uitstekende uitslae behaal het. Uitstaande prestasies sluit in Mizaan Louwies se podiumplek met ‘n derde plek, Evan Cilliers se vyfde plek, asook sterk vertonings deur JM Maritz en Daniël Esterhuizen.
Ons is besonder opgewonde oor die uitbreiding van ons afrigtingspan met die aanstelling van me. R Thomas, asook die toevoeging van me. R van der Walt en me. M van Deventer. Hul ervaring, passie en nuwe energie dra reeds by tot die groei en ontwikkeling van die program.
Met die skoleliga wat binnekort afskop, sien ons met groot opgewondenheid uit na die seisoen wat voorlê. Die toenemende deelname, entoesiasme en positiewe momentum rondom die program bevestig dat Oosie Landloop besig is om sterk te groei en op pad is na ‘n opwindende nuwe era.
2025
Prestasies en Hoogtepunte
Oos-Moot se landlopers het die afgelope paar jaar hul merk op provinsiale en nasionale vlak gemaak. Tydens die NWU 4 km-reeks het die senior seuns- en dogtersspanne ‘n uitstekende 4de plek algeheel behaal, terwyl die junior spanne 5de algeheel geëindig het. Die skool se landloopspan het ook ‘n indrukwekkende 5de plek algeheel in die reeks verower.
By die Noordvaal-kompetisie het Oos-Moot se dogtersspanne uitstekend gevaar met die eerste span wat 9de uit 29 skole geëindig het, terwyl die tweede span ‘n 18de plek behaal het.
‘n Besondere hoogtepunt vir die program was die uitsonderlike prestasie van Chanel Groenewald, wat by die 2025 Suid-Afrikaanse Landloopkampioenskappe ‘n silwermedalje in die 2 km Dash verower het en ook 5de in Suid-Afrika geëindig het in die 4 km o.16-dogterswedloop. Hierdie prestasie bevestig die gehalte van die talent wat binne die Oosie-landloopprogram ontwikkel word.
Chanel se sukses bou voort op ‘n indrukwekkende rekord van prestasie nadat sy reeds as jong atleet ‘n Gauteng-Noord Prestige-toekenning ontvang het deur onder die top landlopers in haar ouderdomsgroep te eindig.
