NETBAL

Ons glo dat netbal soveel meer is as net wat op die baan gebeur. Dit is ’n platform vir groei, karakterbou en die ontwikkeling van lewenslange waardes. Ons spelers slyp nie net hul fisieke vaardighede nie, maar leer ook belangrike lewenslesse – soos spanwerk, verantwoordelikheid, deursettingsvermoë en die waarde van lojaliteit. Elke speler dra ‘n rol in haar span en leer om saam te werk vir ’n gemeenskaplike doel, ongeag die uitslag.

Vir baie van ons dogters is netbal nie net ‘n skoolsport nie, maar die begin van ’n lewenslange liefde vir die spel – of dit nou as speler, afrigter of entoesiastiese ondersteuner is. Die positiewe invloed van netbal strek ver buite die vierhoeke van die baan.

2026

Die 2026-netbalseisoen was vir Hoërskool Oos-Moot ’n jaar van positiewe groei en ontwikkeling. Met toegewyde spelers, afrigters en ’n sterk fokus op spanontwikkeling is daar op verskeie gebiede vooruitgang getoon. Die verbetering in liga-uitslae, die toename in provinsiale verteenwoordiging en die prestasies tydens verskeie toernooie getuig van die harde werk wat deur die seisoen ingesit is.

PUK-reeks

Oos-Moot het uitstekend in die PUK-reeks meegeding en ’n algehele vyfde plek behaal. Drie spanne het met bronsmedaljes huiswaarts gekeer, naamlik die o.19A-, o.19B- en o.17B-spanne, wat almal derde in hul onderskeie afdelings geëindig het.

Toernooie en ligaprestasies

Gedurende die seisoen het die A-spanne aan die AHMP-toernooi deelgeneem, terwyl die B-spanne by die Randburg-toernooi en die C-spanne by die Centurion-toernooi waardevolle wedstrydervaring opgedoen het. Hierdie geleenthede het ’n belangrike rol in die ontwikkeling van spelers en die versterking van spanverband gespeel.

Die netbalafdeling het die 2026-ligaseisoen in die algehele sesde plek afgesluit, ’n verbetering vanaf die sewende plek in 2025. Die totale ligapunte het van 45 in 2025 tot 69 in 2026 gestyg – ’n indrukwekkende verbetering van 24 punte.

Verskeie spanne het besonder goed gevaar en beduidende vordering getoon. Die o.14C- en o.15D-spanne het albei derde in hul onderskeie ligas geëindig, terwyl die o.19A-span ook ’n derde plek behaal het. Die o.14B- en o.19B-spanne het hul ligas in die vierde plek afgesluit.

Hierdie uitslae weerspieël die groeiende mededingendheid van Oos-Moot se netbalspanne.

Gauteng-kampioenskappe

Twee van Oos-Moot se spanne het aan die Gauteng-kampioenskappe deelgeneem. Die o.14A-span het ’n sesde plek behaal, terwyl die o.19A-span sewende geëindig het. Om op provinsiale vlak mee te ding, bied waardevolle ervaring en dra by tot die verdere ontwikkeling van ons spelers.

Provinsiale verteenwoordiging

Een van die besondere hoogtepunte van die 2026-seisoen was die toename in die aantal provinsiale netbalspelers. Waar Oos-Moot in 2025 een provinsiale speler opgelewer het, het hierdie getal in 2026 tot drie gestyg.

Baie geluk aan Skylar Vraagom, Lane Hay en Mia Steenkamp met hul provinsiale verteenwoordiging. Hierdie prestasie is ’n besondere eer vir die spelers en die skool en getuig van hul talent, harde werk en toewyding.

Fast Five

Oos-Moot het gedurende 2026 ook met vier spanne aan die Fast Five-liga deelgeneem, bestaande uit twee junior o.15-spanne en twee senior o.17-spanne.

Drie van die vier spanne, naamlik albei o.15-spanne en een o.17-span, het vir die Tshwane-kampioenskappe gekwalifiseer.

Die o.17-span het daarna verder gevorder na die Gauteng-kampioenskappe, waar hulle ’n agtste plek behaal het. Hierdie prestasie beklemtoon die spelers se deursettingsvermoë en die groei van Fast Five-netbal by Oos-Moot.

’n Seisoen om op voort te bou

Die 2026-netbalseisoen het weereens bewys dat harde werk, volgehoue toewyding en goeie spanwerk die grondslag vir sukses vorm. Hoewel daar altyd ruimte vir verdere groei en verbetering is, het Oos-Moot se netbalspelers met trots en vasberadenheid meegeding.

2025

Die seisoen het afgeskop met opwindende mylpale: ’n rekordgetal Oosie-spelers het vir die eerste keer in ons geskiedenis die finale rondte van die Gauteng-proewe gehaal. Die o.16A-span tree vir die tweede agtereenvolgende jaar as wenners van die NWU-reeks uit die stryd en word vir die eerste keer na die gesogte Wildeklawer-toernooi in Kimberley genooi.  Hul eindig as naaswenners in ‘n naelbyt eindstryd teen Helpmekaar Kollege wat hul slegs een punt klop (24–23).

Gauteng en SA Kampioenskappe

Die o.16A-span is Gauteng Kampioene in hul ouderdomsgroep en eindig hul seisoen in die sesde plek tydens die SA Kampioenskappe.

Fast 5

Die o.15- en o.18-spanne het met uitmuntende spel hul plek in die Fast5-distrikuitspele verseker, deurgedring na die Tshwane-uitspele by Hoërskool Menlopark waar die o.18 span derde geëindig het en gekwalifiseer het vir die Fast Five Gauteng uitspele.

Chantelle Swart (Oud-Oosie)

  • 2016: Haar debuut vir die Golden Fireballs-netbalspan
  • 2017: Sluit aan by die Gauteng Jaguars
  • Jaguars wen Telkom Netbal Liga vier keer sedert haar aansluiting
  • 2021: Haar debuut vir die SPAR Proteas

Jenny van Dyk (Oud-Oosie)

  • Posisie:  Hoofafrigter SPAR Protea Netbalspan 
    Voormalige SA o.21-speler wat haarself as topafrigter gevestig het.
  • Sy lei UP-Tuks na drie Varsity Netball-titels (2017, 2019, 2023) en die Gauteng Jaguars na vyf Premier Netball League-titels (2017–2021).
  • Vanaf 2024 is sy hoofafrigter van die SPAR Proteas