2026
Vanjaar het Oos-Moot vir die eerste keer ’n eie binnenshuise krieketreeks aangebied (Oosie Bash), en ook aan ’n splinternuwe eerstespanreeks deelgeneem. Die groeiende aantal spelers wat jaarliks by die sport betrokke raak, is ’n positiewe aanduiding van die sterk krieketkultuur wat by die skool gevestig word.
Ons o.14-krieketgroep het gedurende 2026 besonder goed presteer en was een van die sterkste groepe jong krieketspelers wat die skool die afgelope paar jaar opgelewer het. Met meer as 25 spelers in die ouderdomsgroep kon Oos-Moot met gemak twee spanne vir ligadeelname inskryf. Beide die A- en B-spanne het uitstekende vertonings in hul onderskeie ligas gelewer en verskeie indrukwekkende oorwinnings behaal. Dylan Fourie, Ruard Pienaar, Eckardt Diedericks en Divan van der Merwe het gedurende die seisoen as uitstaande spelers na vore getree.
Die o.15-krieketgroep het gedurende 2026 merkwaardige vordering getoon en ’n besonder suksesvolle seisoen beleef. Een van die grootste hoogtepunte was die span se oorwinning in ’n nuwe o.15-krieketreeks, waar hulle as reekskampioene uit die stryd getree het. Met ’n indrukwekkende 27 wedstryde gedurende die jaar het die spelers waardevolle wedstrydervaring opgedoen en hul vaardighede verder ontwikkel.
2026 het vir die eerste span in Januarie met ’n toer na Bloemfontein afgeskop, waar die span aan die Kovsie Smash-toernooi deelgeneem het. Die Oosies het ’n uitstekende 6de plek uit 20 skole behaal – hul beste prestasie in die drie jaar wat hulle aan hierdie toernooi deelneem. Gedurende die tweede kwartaal het die eerste span vir die eerste keer aan die Daisy Cup, ’n nuwe krieketreeks van die unie, deelgeneem. Die span het goed meegeding en ’n verdienstelike 4de plek in hul afdeling behaal. Tydens die Junie-skoolvakansie het die eerste span na Potchefstroom getoer, waar hulle twee van hul vyf wedstryde gewen het. Die toer het strawwe kompetisie gebied, onder meer teen Hoërskool Kempton Park, wat bekend is vir sy sterk kriekettradisie. Die ligastruktuur in die B-afdeling is vanjaar aangepas om voorsiening te maak vir dubbele rondtes. Ons eerste span het goeie oorwinnings teen Hoërskool Zwartkop behaal, maar moes ongelukkig in van die ander wedstryde die knie buig.
Ons lewer vir die tweede agtereenvolgende jaar ’n Titans-krieketspeler op. Luke Venter is vir die Titans o.17-span gekies. ’n Besondere prestasie wat getuig van sy talent, harde werk en toewyding aan die sport.Ons skool kon ook met trots spog met die aanstelling van mnr. J. Redelinghuys as lid van die Titans o.17-afrigtingspan. Hierdie erkenning op provinsiale vlak weerspieël die gehalte van afrigting en krieketontwikkeling by Oos-Moot.
Afrigtingspan
Die sukses van Oos-Moot Krieket word ondersteun deur ‘n ervare en toegewyde afrigtingspan. Die hoofafrigters is:
- Mnr J Redelinghuys – Vlak 2-afrigter met internasionale afrigtingservaring.
- Mnr L Booysen – Tweemalige Noordvaal-wenafrigter.
- Mnr J Boshoff
- Mnr J Neethling – Vlak 2-afrigter en voormalige Lions-provinsiale afrigter.
- Mnr F Massyn – Vlak 2-afrigter.
Die program word verder versterk deur buite-afrigters mnre J de Bruyn, D Corbett, E Visagie, T Gouws (voormalige Titans Colts-speler met internasionale ervaring in Engeland en Noord-Ierland), R Spies en S Oosthuizen, wat vanaf die derde kwartaal by die afrigtingspan aansluit.
Met sterk leierskap, groeiende deelname, uitstekende prestasies en innoverende projekte soos die Oosie Bash, is Hoërskool Oos-Moot se krieketprogram besig om hom as een van die voorste ontwikkelende krieketprogramme in Pretoria te vestig. Die toekoms van Oos-Moot Krieket lyk besonder belowend.
2025
Die 2025-krieketseisoen het vanjaar vroeg afgeskop, met die eerste wedstryd reeds op 4 Januarie. Die jaar het die vooruitgang van Oos-Moot se krieket duidelik gewys – ons het groot wenne behaal en die algehele prestasies het die groei van die program beklemtoon. Meer seuns sluit jaarliks by die sport aan, wat ons krieketprogram steeds versterk.
Prestasies
- o.15-groep wen die Finbury-reeks aan die begin van die jaar met die uitblinkers M Broodryk, I Labuschagne en C van Heerden.
- M Broodryk is die eerste Oos-Moot Titans o.15-speler wat verkies is vir die provinsiale week in Desember.
- M Broodryk en I Labuschagne het ingeskakel by die eerste span waar M Broodryk as top scorer en I Labuschagne as o.15 bowler van die jaar aangewys is (meer as 40 paaltjies).
- Eerste span wen die Finbury-reeks asook die promosie\relugasiewedstryd teen Hoërskool Linden wat beteken dat ons in 2026 teen sterker kompetisie deelneem.
- Eerste span eindig tydens die Kovsie Smash 9de uit 20 skole.
Uitblinkers
-
Beste Senior Speler: D Corbett
-
Beste Junior Speler: M Broodryk
-
Beste Senior Kolwer: R Spies
-
Beste Junior Kolwer: M Broodryk
-
Beste Senior Bowler: E Theron
-
Beste Junior Bowler: I Labuschagne
