KULTUUR

BOODSKAP VAN ONS KULTUURHOOF

Kom skubaduik saam met ons en verken die kultuuryke seelewe van die “Blou Golf”.   

Hier by Hoërskool Oos-Moot is ons skuba-druppels in die “Blou golf” en kultuur is die  lugbottel wat ons aan die lewe hou.  Daarsonder is borrelsiekte ons enigste voorland.  Maak jouself gereed vir ‘n skubaduikervaring van ‘n leeftyd wanneer jy die kultuur hier by Hoërskool Oos-Moot van naderby verken.  Ons verskaf alles vir hierdie avontuur.  So kom, die son trek water en hier is geen tyd om soos ’n vis op droë grond te spartel nie. 

Wag…voordat ons inval, kom ons maak seker dat u gereed is vir die mees onvergeetlike kultuurervaring van u hele lewe.

  • Het jy jou Oos-Moot duikpak aan, want Oos-Moot se kultuur kruip soos water onder jou vel.
  • Paddavoete: Jy gaan nie anders kan as om diep spore in die kultuurgeskiedenis te kom trap nie.
  • ’n Loodgordel om jou onder te hou: Jy gaan die kultuurvariasie so geniet, jy gaan nie die blou see wil verlaat nie.
  • Sit maar op jou duikbril en kyk mooi, want hier is baie om te sien en te doen.
  • ’n Suurstofreguleerder: As jy sien wat ons te bied het, gaan jy na jou asem snak.
  • ’n Dryfbeheertoestel: Jy gaan dit nodig hê, want jy gaan ’n rukkie hier besig wees, so vir vyf jaar.
  • En asseblief pak in jou waterdigte kamera, jy gaan herinneringe vir ’n leeftyd hier vasvang.

Julle veiligheid hier in die blou see is vir ons prioriteit en daarom sorg ons dat jy vroegtydig duiklesse ontvang, sodat jy dadelik met ‘n geruste hart kan inplons en die kultuursee gaan verken.  Passievolle onnies en kenners, ware kultuur-entoesiaste, sorg dat jy op elke kultuurgebied toegerus word met die nodige vaardighede om die kuns van elke aktiwiteit te bemeester.  Ons gaan gereeld ons toerusting na, skerp ons kennis op en kom vorendag met nuwe geleenthede waar jy jouself 100% kan uitleef.  Hier by Oos-Moot kom ons getrou een van die belangrikste duiklesse na en dit is om altyd sáám met ander mense te swem en kultuur só, nog meer te geniet.  Oosies, ek hoop julle haal nog asem, hier is baie om te doen.

Bly kalm, moenie paniekbevange raak nie. Jy gaan vir vyf jaar hier wees.  Dit gee jou genoeg tyd om alles hier in die blou Oosie-kultuursee te verken.  Hier by Hoërskool Oos-Moot neem ons kultuur ernstig op.  Ons is nie bloot net ’n skool visse nie en ons swem ook nie net saam met die stroom nie.  Daar sal nog baie water in die see moet loop voordat ons ooit gaan opkom vir asem. 

Maak jouself reg vir die beste kultuurervaring van jou lewe. 

Me Crisna Bezuidenhout

KULTUURHOOF

Redenaars/Debat
ATKV
c.bezuidenhout@oos-moot.co.za