Me M Combrinck
m.combrinck@oos-moot.co.za
🎨 Oosie-Kunsklub – Waar kreatiwiteit grense oorskry en verbeelding lewe kry
‘n Ruimte om vry te skep
By die Oosie-Kunsklub glo ons dat elke leerder die vermoë het om kuns te skep – of jy nou al jare teken of eers nou begin ontdek hoe kreatief jy is. Hier kan jy jou verbeelding vlerke gee, jouself uitdruk sonder beperkinge, en unieke skeppings tot lewe bring in ‘n veilige, ondersteunende ruimte.
Skep. Leer. Groei.
Of jy in jou hart glo jy is ‘n kunstenaar, graag jou vaardighede wil slyp, of net jou kunstige kant ‘n kans wil gee – die kunsklub is vir jou. By ons is elke Oosie welkom, met of sonder ervaring.
Ons verken verskillende kunsmediums en tegnieke, gee leerders die kans om nuwe vaardighede aan te leer en persoonlik te groei. Die klub bied jou ook die geleentheid om jou werk bekend te stel, met deelname aan verskeie interne én eksterne kunskompetisies.
Ervaring wat jou wêreld verbreed
Benewens praktiese sessies, word kunsklublede ook genooi om saam met die Visuele Kunste-leerders opvoedkundige uitstappies by te woon. Só word ons horisonne verbreed en ons liefde vir kuns verdiep.
KREATIEWE KUNS 2025
OOSIES | KUNSKLUB
In Kwartaal 1 het ons kreatiewe Kunsklub-leerders saam met die Lewenswetenskappe-departement ‘n opwindende kompetisie gehou. Hulle het die skedels uit die Wetenskapklas op unieke en kleurvolle maniere versier, wat aan hierdie skedels nuwe artistieke lewe gegee het. Die resultaat? Pragtige, oorspronklike kunswerke wat wetenskap en kreatiwiteit op ‘n besonderse manier kombineer!
